Iruñeko Udalak 2024rako aurrekontuak aurkeztu ditu gaur: 266.9 milioi euro izanen dituzte. "100 eurotik 41 izanen dira gastu sozialera bideratuko duguna eta 100 eurotik 20 auzoetan hobekuntzak egiteko", azpimarratu du Joseba Asiron alkateak. Hiriko proiektu handiak garatuko dituzte, arrazoizko prezioa izanen duten etxebizitzak, etxerik gabekoei irtenbide integrala eskainiko zaie eta bizikidetzan aurrera eginen da. Horixe nabarmendu dute udal taldea osatzen duten alderdiek.
Nafarroako Parlamentuan gaur dira bozkatzekoak 2024ko aurrekontuak. Hainbat hedabideren arreta erakartzen duen une hori protesta egiteko aprobetxatu nahi izan dute F6 mugimenduko nekazariek eta abeltzainek. Goizean goiz abiatu dute elkarretaratzea foru legebiltzarraren parean, ohi dutenez, traktore eta guzti. Han bertan gosaria egin dute, eta barruan osoko bilkura hastekoa zelarik, 9:15 aldera, indarka sartzen ahalegindu dira. Une horretan, bultzadak, kolpeak eta tentsio handia izan dira atea zaintzen zuten foruzainen eta protestan ziharduten nekazarien artean.