"Nafarroan garraiolariak hutsaren ondorengoa dira", esan du Hiru sindikatuak. Hego Euskal Herrian aurten hamalau garraiolari zendu dira, horietatk zazpi Nafarroako errepideetan. "Zazpi heriotza horietatik lau istripu berean izan ziren; goizaldean", salatu du Alberto Nuñez Hiru sindikatuko eledunak. "Ez da kasualitatea istripu asko gaueko ordu txikitan izatea. Zerikusi handia du zein lan baldintzetan ari diren ezagutzea: presioa eta presa dira nagusi sektorean", azaldu du. Azken lan-ezbeharretan bizitza galdu duten garraiolarien adinak ere zer esanahi handia duela uste dute: "58, 54 eta 50 urte zituzten. Garraioan ez da erreleborik eta zahartu egin da sektorea. Adin batetik aurrera garraiolariek arrisku handiagoa dute konortea galtzeko, bihotzekoa izateko, erreflexuak galtzeko edota zorabiatzeko", ohartarazi du. "Garraiolariak zahartu badira eta erreleborik ez baldin badago baldintza onik ez dagoelako da", uste dute. Horren aurrean, administrazioak beste alde batera begiratzen segitzen duela salatzen ari dira: "Ez dituzte beharrezko neurriak hartzen arazoari aurre egiteko".
"Nafarroako garraiolariak ez du inolako babesik ez gurpilak aldatzeko laguntzarik, ez errentan gastua desgrabatzeko aukerarik ezta jarduera uzten dutenei EAEn adibidez ematen zaizkien erretiroen osagarririk ere", kritikatu dute. Hiru, Anet eta Tradisna elkarteekin batera ari da Nafarroako Gobernuari sektoreak bizi dituen arazoei heldu eta erantzunak emateko eskatuz. "Kezka horiez gainera, bidesarien eta fiskalitatearen ingurukoak dira kezka nagusiak", easn du Nuñezek. Hiru talde horiek bihar agerraldia eginen dute Sarasate pasealekuan sektoreak bizi duen errealitatearen berri eman, euren aldarrikapenak zeintzuk diren azaldu eta mobilizazio sorta aurkezteko.
Korrontearen kontra bidesariekin
Nafarroako bost autobideetan kamioiei bidesaria jartzeko asmoa abian da horretarako sortu baitu gobernuak Nafarbide enpresa publikoa. "Tresna horren bidez Nafarroako garraiolariak galtzen ateratzen gara beste behin", adierazi du Hiru sindikatuak. Behin eta berriro egin dute elkarteek arauak aldatzeko eskaera, baina ez dute erantzuten", kontatu du.
Argazkian klik eginda entzun daiteke Alberto Nuñezi Euskalerria Irratian egindako elkarrizketa.