Egunak eta gauak ematen dituzte kalean. Etxegabeak dira, asko etorkinak eta deus gabe daude. Oherik ere ez zaie eskaintzen. Entitate sozial ugari atera dira egunotan kalera egoera honek berehalako irtenbidea behar duela eskatzera. "Aterpetxe berria zabaltzea albiste ona da nahiz eta ez den guztiei erantzuna ematera iristen. Hilabeteak daramatzagu egoera salatzen eta iruditzen zaigu berandu datorrela erabakia", esan du Paris 365 Fundazioko kide da Mikel Urabaienek.
Dena dela, aterpetxea ere ez litzateke nahikoa izanen euren bizia duintzeko: "Eguneko zentroa ere beharko lukete eurekin egunerokoa egiteko: babesa behar dute, laguntza, gurera egokitzeko aukera, higiene gutxienekoa, gaixorik badaude hobetzeko aukera", azaldu du. Izan ere, aterpetxeetan goizeko zortzietan uzten dituzte kalean berriz. Horrela ezinezkoa dute egunerokotasun egoki bat hastea. Hori gutxi balitz adinez txikiak direnek ez dute aukerarik ere aterpetxe horietako batean lo egiteko: adin txikikorik ez baitute onartzen: "Kalean bizitzera kondenatuak daude, beraz", esan du.
Entitate sozialek eskaera argia dute: irtenbide egokia eman nahi bazaie babes integrala behar dute. Dei hori egiten diete instituzioei eta hain zuzen hori bera eskatuko diete gaur Iruñeko alkate Cristina Ibarrolari eta Nafarroako Gobernuko Eskubide Sozialetarako kontseilari Carmen Maezturi. 18:00etan izanen dira biak aterpetxe berria bisitatzen: Gonzalez Tablas 8.ean dago. "Kalera atera daitezela eta ikus dezatela zein den egoera. Hala konturatuko lirateke zein motz gelditzen den euren eskaintza", ohartaraziko lieke Urabaienek.
Entzun Euskalerria Irratian egindako elkarrizketa argazkian klik eginda.
