Herri indigenek eta ingurumenaren aldeko mugimenduek azken hamar urteetan Ekuadorko Estatuarekin izandako borrokak bere fruituak eman ditu: historian lehen aldiz, herri galdeketa batek erabaki du Yasuni parke nazionalean dagoen ITT-43 blokeko petrolio gordina lurpean gera dadin. Waorani etniakoek esan zuten baiezkoaren alde bozkatuko zutela, argudiatuta petrolio putzuek ez dutela lagundu beren komunitateen garapenean. Petroecuador estatuaren petrolio enpresa 2016an hasi zen petrolioa ustiatzen.
Yasuniko Parke Nazionala Amazoniako eskualdean dago, Orellana eta Pastaza probintzien artean, Ekuadorko hiriburutik 250 kilometrora. Unesco Hezkuntza, Zientzia eta Kulturarako Nazio Batuen Erakundeak biosfera erreserba izendatu zuen Yasuni parke nazionala, 1989an, eremuak zuen aberastasun natural eta kulturalagatik. Unescoren arabera, munduan metro koadroko bizi aniztasun handiena duten eremuetako bat da Yasunikoa. Gainera, hainbat etnia indigenaren bizilekua ere bada; hain zuzen, haietako batzuk borondatez bakartuta daude.
