Josu Lariz erbesteratuaren inguruko 'Oroimina Loretan' dokumentala estreinatuko dute gaur

Euskalerria Irratia 2021ko api. 22a, 08:08

Uruguaira exiliatu zen Josu Lariz Iriondoren inguruko dokumentala da Oroimina loretan. Haren "oroiminak eta bizipenak" erakusten ditu. Katakraken aurkeztuko dute, 19:00etan.  

ETAko kide zelakoan Guardia Zibila bere bila joan zenean, Elgoibar utzi eta iparraldera erbesteratu zen Josu Lariz Iriondo, 1984an, eta handik gutxira, 1988an, Uruguaira joan zen. Arrazoi politikoengatik herritik ihes egin eta patu bera jarraituko zuten beste euskal herritar batzuei bidea ireki zien urrats hark.

Dokumentalak Larizek 30 urte baino gehiagoz bere "oroitzapenen lorategian" izan dituen bizipenak kontatzen ditu. Besteak beste, 1990eko hamarkadaren hasieran, bera eta beste hamabi euskal herritar atxilotu zituztela Montevideoko La Trainera jatetxean lanean ari zirela, ETAko kide izatea egotzita. Horietako hamar aske utzi zituzten, urtebete baino gehiago espetxean eman ondoren; hiru euskal herritar estraditatu zituzten gose eta egarri greba egin ostean, eta bi uruguaitar hil ziren, horietako hiru estraditatzearen aurka protesta egiten ari zirenean, Filtro ospitaletik gertu.
 
Guztira, hiru bider sartu zuten kartzelan, Uruguain bitan eta behin Argentinan, eta Espainiar justiziak egindako estradizio eskariei bi herrialdetan irabazi dien euskal herritar bakarra da. Espainiako estatuan oraindik itxi gabeko kausak dituenez, ezin du bere jaioterrira itzuli, eta egun Montevideon bizi da.

Dokumentalak, beraz, bere oroiminak eta bizipenak kontatzen ditu. Sekuentzia batzuk Super 8mm-ko filmarekin grabatu dira, ikuslea iraganeko garaietara eramango duen estetika sortuz.
 
Dokumental hau Kutxa Hutsak, euskal erbesteratuen espreientziak egitasmoaren parte da. Ikus-entzunezko proiektu dokumental hori 2012an sortu zuten, Francoren diktadura amaitu zenetik erbestera joan diren euskal herritarren esperientziak eta bizipenak jaso, ezagutu eta erakusteko. Emaitza hau, Oroimina loretan lana, Katakraken erakutsiko dute gaur, 19:00etan.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!