Langileen Nazioarteko Egunaren bezperan, sindikatuetako Nafarroako arduradunek —Amaia Villanuevak, Joseba Eceolazak, Imanol Pascualek, Imanol Karrerak, Iratxe Alvarezek, Raul Lopezek eta Imanol Iberok— azaldu digute nola ikusten duten etorkizuna eta zeintzuk izango diren euren biharko aldarrikapenak.
Maiatzaren Lehena berezia izango da aurten; ohiko protestak egin ezinda, sindikatuek formula berriak bilatu dituzte: manifestazio birtualak, sareen bidezko aldarrikapenak, balkoietako protestak…
Giro nahasian helduko da, gainera, aurtengo Maiatzaren Lehena: Espainiako Gobernuak Nafarroan duen ordezkaritzak debekatu egin du, batetik, CGT, ESK, Solidari eta Steilas sindikatuek egin nahi zuten ekitaldi "sinboliko" txiki bat, eta, bestetik, LABek antolatua zuen kotxe karabana. Bi kasuetan helegitea aurkeztu dute.
Biharko deialdi nagusiei dagokienez, batetik, CCOOek eta UGTk biharko eguna langileei eskerrak emateko baliatuko dute. Bestetik, ELAk, LABek, ESKk, Steilasek, Hiruk eta Etxaldek ere deialdi bateratua egingo dute, eta bizitza erdigunean jarriko duen eredu bat aldarrikatuko dute.
