"Justizia" aldarrikatzen jarraitzen dute hainbat eragilek eta herritarrek Elhadji Ndiayeren heriotza argitzeko, azken ekimena, asteazkenean; haren gorpua Senegalera eraman zuten egun berean, elkarretaratzea egin zuten Arrotxapea auzoko Martzelo Zelaieta kalean, hau da, Udaltzaingoak atxilo hartu zuen tokian.
Udaltzainek eraman zutenean, konorterik gabe zegoela ikus daiteke sareetan zabaldutako bideo batean. Zalantza, airean, beraz: "Zer gertatu zen?". Hori da SOS Arrazakeriak mahaiaren gainean behin eta berriz jarritako galdera.
"Elhadji Ndiayeren heriotzari emandako tratamenduak argi eta garbi adierazten du bizitza guztiek ez dutela berdin balio", salatu du SOS Arrazakeriak. Sistemarteko indarkeriaren aurpegi guztiak aitatu ditu arrazakeriaren kontrako eragileak, zapalkuntza anitzak: "Generoak, arrazak eta klaseak zehazten dute gorputz batek balio duena; bizi batek balio duena; heriotza batek balio duena". "Beltza bazara, komisaldegian hil zaitezke, atxiloketa bortitz baten ostean, eta inork ez du azalpenik emateko beharra ikusten, kontuak emateko asmorik ez dago, ez da erantzunik ez ondoriorik aurreikusten".
