Nafarroako Gobernuz Kanpoko Erakudeek egitarau zabala izanen dute datozen bi asteotan, Iñaki Elorza Nafarroako GKE-en koordinakundeko kideak iragarri moduan.
Alde batetik, IPES elkarteak antolatutako Mundua eta Giza Eskubideak zinema zikloa emanen da, gaur abiatu eta ostirala bitartean. Giza eskubideekin zerikusia daukaten gai desberdinen inguruan hausnartzeko parada eskainiko duten filmak izanen dira ikusgai aste osoan zehar, denak ala denak 19:30ean 6 euroko sarrerarekin, ostiralean emanen den doako saio bakarra ezik, Iñaki Alforjaren 16.060 egun filmarena.
Bestalde, Nafarroako GKE-en koordinakundearen webgunean aurkitu daitekeen jolas bat proposatu digu Elorzak, "munduan gertatzen diren gauzen inguruan zein puntutaraino dakigun aztertzeko" helburua dutenak. Hala, gai desberdinen inguruko galdeketak aurkeztu daitezke online joko hauetan.
Azaroaren 20an Umeen Eskubideen Nazioarteko Eguna izanen da. Horren harira, haur migratu edo arrazializatuen inguruan mintzatzeko jardunaldiak antolatu ditu Nafarroako Gobernuko Migrazio Politiken Zuzendaritzak, Nafarroako Unibertsitate Publikoko Unesco Katedrarekin batera. Azaroaren 13an eta 14an izanen dira jardunaldiak, eta egitarau zabala izanen du.
Azaroaren 23an, larunbatarekin, auzolan bat antolatu da Burlata inguruan Arga ibaia garbitzeko. Elorzaren aburuz, "oso garrantzitsua da gure ibaiak garbi mantentzea" eta horretara bideratuko da bizpahiru ordu iraungo duen auzolana. Elkartzeko hitzordua 10:00etan jarri da Burlatako zubi zaharrean, eta lana amaitutakoan hamaiketakoa emanen dela ere adierazi du Elorzak.
