Armadak ezezkoa eman dio Zurekin Nafarroa taldeari Bardeako tiro poligonoa bisitatzeko. "Arrazoi operatiboengatik debekatu digute baimena. Armadak mezu labur baten bidez jakinarazi digu", azaldu du Ane Sanchez Zurekin taldeko kideak. Sekretismoa dago guzti horren atzean: "Informazio falta eta opakutasuna agerian geratzen dira. Ez dute nahi ezagutu dezagun zein eragin duen tiro poligonoak ingurumenean. Bardea biosferako eremu da", gogorarazi du.
"Onartezina da eremu hori mantentzen segitzea", salatu du Sanchezek. Bardeako tiro poligonoaren inguruko informazio "argia eta gardena" eskatzen segituko dute Zurekin taldeko kideek. Tiro eremu militarra desegiteko galdegiten ere bai. "Benetako bonbak erabiltzen dituzte gero gerrarako baliatuko dituzte ariketa militarren bitartez. Ezin du horrek horrela segitu", krikikatu du.
