Nafarroako Bertsolari Txapelketako finalaren atariko azken saioa jokatu zen larunbatean Lesakako pilotalekuan. Abenduaren 2an Anaitasunan jokatuko den finaleko zortzikotea argituko zuen saioa izanik, zirrara nabarmena zen bai publikoan baita bertsolariengan ere. Urduritasunak urduritasun, Joanes Illarregi nagusitu zen, 525,5 punturekin, finalerako zuzeneko pasea eskuratuz.
Haren atzetik gelditu ziren Eneko Lazkoz, 521,5 punturekin; Josu Sanjurjo, 492,5ekin; Eki Mateorena, 458 punturekin; Mikel Lasarte, 453,5ekin eta Beñat Astiz, 401 punturekin. 500 zalek lepo bete zuten herriko pilotalekua eta hantxe egon zen Bittori Elizalde bertsolaria ere. Elizalderen iritziz, saioa hotz hasi bazen ere, girotzen joan zen aurrera egin ahala.