Iruñerriko euskaldunon agerkaria
euskalerriairratia.eus

Compains: "Milaka torturatu egon dira baimentzen zuen sistema oso bat eraiki delako"

Euskalerria Irratia 2017-05-18 13:40   Gizartea  Nafarroa

Auzitegi Konstituzionalak hala aginduta, gaur deklaratu du Eneko Compainsek; 2010ean atxilotu zuten, beste bost lagunekin batera, eta torturak salatu zituen. Zazpi urte pasa dira horrez geroztik.

Compains: "Milaka torturatu egon dira baimentzen zuen sistema oso bat eraiki delako"
Argazkia: Eneko Compains, Nafarroako parlamentuan egindako agerraldi batean. | Ikusi handiago | Argazki originala

"Euskal Herrian milaka tortura kasu egon dira, ez kontrolik gabeko lau guardia zibilek hala izan nahi dutelako, baizik eta hori baimentzen zuen sistema oso bat eraiki delako" esan du Eneko Compainsek Iruñeko Auzitegira sartu aurretik. 2010ko irailean hartu zuten atxilo, beste bost kiderekin batera, eta 7 urteotan ez du epaile aurrean deklaratzeko aukerarik izan.

Auzitegi Konstituzionalak agindu du haren auzia berriz ikertzeko, Compainsen irudiko, "Estrasburgotik eman dizkioten zapaztekoak aintzat hartuta". Atzo auzi medikuak hitz egin zuen epaile aurrean; Compainsen txanda izan da gaur; baina, dena dela, oraindik ikusteke dago ahozko epaiketa izanen den ala ez. 

Auzitegiengan "konfiantza eskasa" duela adierazi du, ez, ordea, herritarrengan: "Itxaropentsu nago, baina itxaropena daukat herriarengan, torturaren aurka konpromisoak hartu dituzten herritarrenagan". 

Nafarroako Gobernuari begira 

Atxilotu zutenean Donostian zegoenez, Paco Etxeberriak ikertu du Compainsen tortura kasua, Eusko Jaurlaritzak eskatuta, beste hainbat kasurekin egin duen gisan. EAEko bidea izan du hizpide gaur Compainsek eta eskaera zuzena egin dio Nafarroako Gobernuarri, "azterketa sakona" egin dezan, "torturak Nafarroan izan duen eragin erreala ezagutzeko; tortura itzaletik argira ekartzeko".

Gainontzeko biktimen gisakoak

Auzitegi parean, elkarretaratzea egin dute hainbat herritarrek 5.657 torturatu. Inpunitaterik ez lelopean. Txalo zaparrada jasota sartu da Compains epaile aurrean deklaratzera. "Torturatuok biktimak gara; besteei zor zaiena zor zaigu: aitortza, erreparazioa eta ez errepikatzeko bermea", esan du.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa