Nafarroa Oinezek bere txoko propioa dauka sanferminetan, Oinez Txokoa, non eta Takonerako parkean. Azken urteetan, bere lekua irabazten joan den leku bat da, antolatzaileentzat aurretiko lan handia dakarrena. Ugaitz Martinez eremuaren arduradunak kontatu digun bezala, goizeko 9:00etan irekitzen dute txozna, eta goizeko ordu txikiak arte atseden hartzeko tarte gutxi daukate. Gaurko programan, txarangaz gain, Itzal magoa egonen da, baita Arerio eta Apotheke taldeen kontzertuak ere, arratsalde-gau partean. DJ-ekin bukatuko dute gaua. “Txikientzako zein gazte eta nagusientzako leku bat da Oinez Txokoa, eta batez ere euskara sustatzeko leku bat”, azpimarratu digu. “Familiarekin egoteko leku aproposenetako bat da, jatekoa eta edatekoa badago, eta itzalpe ederra ere badago, oraintxe benetan eskertzen dena”.