Azken urteotan besta deszentralizatzeko ahaleginak egin diren arren, Asier Cabo eta Mikel Lizaso AZ auzokideek argi dute: “Sanferminak Alde Zaharrera mugatzen dira bere gehiengoan, oraindik ere”. Sanferminak auzoetara eramateko saiakera oso erronka zaila dela jakin badakite. Cabok erran bezala, “Nabarreriaren eremua eguneko orduetara mugatu da gehiago azken urteotan, baina badira beste gunean egun eta gau, beti daudela beteta”.
Lizasok erran bezala, “sanferminek oraindik badaukatea gauza on bat, eta da oraindik oso herrikoiak direla”. Turismoaren eraginaz ere aritu dira AZ auzo elkarteko bi kideak. “Egia da auzoan turismoari begira gehien saltzen den gauzetako bat dira sanferminak. Eta herrikoiak diren arren, beti badago pultsu bat sanfermin burgesen eta san fermin herrikoien artean”. Lizasok argi du norgehiagoka horretan “gazteek irabaziko dutela”. “Gaur egun, alde zaharrean gazteen artean dagoen mugimendua oso indartsua da eta eremu askotara iristen ari dira, gure indargune dira, eta berme bat dira horrelako jaiak eta egunerokoan ere beste moduko auzo bat eraikitzen jarraitzeko”. “Alde Zaharra oso auzo komunitarioa da”, gehitu du Cabok, “eta sanferminetan hori ere ikusten da, pozgarri da hori”.