“Berandu da”, Indarkeria matxistaren aurkako plataformaren iritziz, indarkeriaren aurrean udal estrategia txukun bat diseinatzeko. Baina hitz egiteko prest dira, horregatik, Iruñeko Udalak deitutako hurrengo bilerara joanen dira. Itxaropentsu dira, herenegun, Emakumearen Udal Kontseiluan protokoloa bere horretan utziko dutela esan zietelako.
Maiatzaren 12an Indarkerien Talde Iraunkorraren mahaitik altxatu ziren feministak, Navarra Sumak udal estrategia aldatu nahi zuela ikusita. Protokoloa eta komunikazio kanpaina adostasunez garatzea ezinbestekoa dela aldarrikatu dute.
Oraindik ez dute udalarekin izanen duten bileraren data zehaztu, baina argi dute udal-gobernuari erantzukizunez jokatzeko eskatuko diotela, "bizitzak daudelako jokoan".