Behin-betiko datuak falta diren arren, ELA sindikatuko kide Imanol Pascualek jarraipen handiko greba eguna dela atzeman du lehen ordutik. “Uste dugu Nafarroan urte luzez egin dugun lanari esker gai izan garela aliantzak sortzeko sektore desberdinekin, baita Etxebizitza Sindikatuekin ere, eta horren ondorio da Estatuan azken urteotan lau greba egin diren bitartean Nafarroan 13 egin ditugula”. ELA sindikatuko gaurko salaketa nagusia “etxebizitza politiken porrota” dela gehitu du. “Horren adibide garbia dira Nafarroako aurrekontuak, guretzat guztiz onartezinak direnak”.
“Nafarroako alderdiei neurri estrukturalak eskatzen dizkiegu, etxebizitzaren egoera hobetzeko”, azpimarratu du ELA-ko kideak. Iruñeko Udaletxearen aurrean goizeko 8:30ean protestak egin ditu sindikatuak, besteak beste Aranzadiko aterarazteak salatzeko.