Industria musikalaren algoritmoen eta interes ekonomikoen aurrean, Euskal Herrian bestelako musika-eszena bat eraikitzeko sortu dute Erre proiektua. Bera herrian aurkeztu berri dute eta Oier Fuentes, proiektuko kidea, Metropoli Forala saioan elkarrizketatu dugu. Haren ustez, plataformen logikak proiektu txikiak entzuleengana iristea zailtzen du: "Txikia txikiago eta handiagoa handiago egiten dute". Entzuleak ere eredu horren menpe daudela dio: "Entzulea ere pobretu egiten du, plataformen menpe gaude". Algoritmoek gomendatutako musikak entzutean, gure aukerak eta musikaz dugun esperientzia mugatu editen da.
Horri aurre egiteko, Errek musikariak, kolektiboak eta musikazaleak elkartzeko sare propioa sortu nahi du. Horren adibide da Erreproduktorea, komunitateko musika biltzen duen entzute-gunea, publizitaterik eta algoritmorik gabea. Baina helburua ez da tresna digital bat eskaintzea bakarrik: zuzeneko musika, tokiko proiektuak eta artisten eta entzuleen arteko harreman zuzena sustatzea ere bada.