Yala Nafarroa Palestinarekin elkarteak Palestinari monumentu bat jarri dio Iruñeko Antoniutti parkean. Dagoeneko ezarrita dagoen arren, larunbatean aurkeztuko da jendaurrean arratsaldeko 18:30ean, Ernesto Delas elkarteko kideak argitu bezala. Ekitaldian ez dira faltako musika, dantza eta bertsolariak; baita monumentua jartzea erraztu duten erakundeetako ordezkariak ere. "Oso eskertuta gaude Iruñeko Udaletik zein Nafarroako Gobernutik eman diguten babesarekin".
Monumentuak oroigarri bat bakarrik ez, eta aldarri bat izateko asmoa du. "Gure herriaren elkartasuna eta herri palestinarrentzako justizia eta duintasunaren aldarrikapena islatzen duen arte lana da. Genozidioaren basakeriaren biktimei argia eman eta haien erresistentzia zilegia ohoratu nahi duen obra bat da. Espazio hau munduko herri guztiak zeharkatzen dituen zauri baten aurreko topagune gisa altxatzen da; Palestinaren kausa gizateriaren kausa da". Hala, monumentuaren oinean hiru mezu zizelkatu dira, zein baino zein argigarriagoa: "Palestina bizirik dago. Palestina borrokan darrai. Palestina aske izango da". Izan ere, Delasek berak azpimarratu bezala, esperantzarekin begiratu behar zaio Palestinaren etorkizunari, borrokak eta erresistentziak aurrera jarraitu dezan.