Eskolak ez dira eduki akademikoak transmititzeko espazio hutsak. Bertan, haurrek nor diren eta gizarteak haiengandik zer espero duen ere ikasten dute. Ideia horretatik abiatu da Leire Lafuente Duqueren Gradu Amaierako Lana, “Hezkidetzatik haratago: pedagogia feminista eta maskulinitate subjektiboak hezkuntza-proposamenetan” izenekoa. Berak Lehen Hezkuntzako Gradua eta Hezkuntza afektibo-sexualen titulua eskuratu du.
Praktikaldian ikasgelan ikusitako egoerek bultzatu zuten ikerketa egitera. "Galdera bat etorri zitzaidan burura: ea hezkuntzak maskulinitate tradizionalak eraldatzen edo erreproduzitzen dituen". Lanaren bidez, pedagogia feministaren ikuspegitik gaur egun dauden bi hezkuntza-proposamen aztertu ditu. Ondorioztatu du hezkidetzan aurrerapauso handiak eman diren arren, mutilen sozializazioa eta maskulinitateen lanketa oraindik gutxi jorratzen direla.
Horri erantzuteko, “Patiotik mundura” izeneko Lehen Hezkuntzarako esku-hartze didaktikoa diseinatu du.
Lafuenteren ustez, prebentzioa txikitatik hasi behar da. "Maskulinitateak modu kritiko, kolektibo eta eraldatzailean landu daitezke Lehen Hezkuntzatik", nabarmendu du. Bere esanetan, hezkuntzak gizarte berdinzaleago eta baketsuago bat eraikitzeko tresna baliotsua izan dezake.