Urbasako basoaren bihotzean dago Amaia frontoia. Garai batean pilotaz, jendez eta bizitzaz betetako topagunea izan zen; gaur egun, berriz, abandonatuta dago eta hondatzeko arriskuan. Hori saihesteko, herritar talde batek frontoia berreskuratzeko ekimena abiatu du. 2024ean sortu zuten Urbasako Frontoi Auzolan Taldea Nafarroako Gobernuari pilotalekua konpon dezan eskatzeko.
Urbasako Amaia frontoia "gure kulturaren parte” da Olatz Ruiz de Larramendi pilotariarentzat. Bertan eman zituen lehen pilotakadak, eta han erabaki zuen pilotaria izan nahi zuela. Horregatik, penaz bizi du gaur egun duen egoera, baina itxaropenez ikusten du azken urteetan herritarrek abiatutako auzolana.
Ruiz de Larramendik azaldu du frontoia berreskuratzeak pilotaz harago doan balioa izango lukeela: Urbasari berriz ere bizia ematea, herritarrak elkartzea eta belaunaldi berriei espazio hori ezagutzeko aukera eskaintzea. Bere nahia argia da: Amaia frontoia berriz ere pilota partidak, herri kirolak eta bestelako ekitaldiak hartzen dituen topagune bizia izatea.