Ane Zuazubiskar Iñarra kazetari eta bertsolariak "Tigre bat azalean" poema bildumarekin aurtengo Iruña Hiria poesia saria irabazi du. Nafarroako Ateneotik jaso zuen albistea ezustean hartu zuela aitortu du: "Ez nuen inoiz pentsatu idatzitako honek liburu forma hartuko zuenik".
Saritutako lana urteotan idatzitako poemek osatzen dute. Batzuk aspaldikoak dira, beste batzuk berriki sortuak, eta gehienak ahoz gora irakurtzeko idatzi zituen. Egilearen hitzetan, bere belaunaldiak bizi duen uneaz eta bere bizipen eta testuinguruaz hitz egiten dute poemek.
Zuazubiskarrek azaldu du bertsolaritzak eta poesiak hitza partekatzen duten arren, sormen prozesua oso ezberdina dela. Bertsoa berehalakotasunari eta taldeari lotuta dagoela dio; idazketak, aldiz, beste erritmo eta askatasun bat eskaintzen dio.
Orain, sariari esker, poema bilduma liburu bihurtuko da. Egileak aitortu du prozesu berria dela beretzat, ez duela espektatiba handirik baina ilusio handia egiten diola jendeak bere poemak irakurri ahal izateak.