Herritarren parte hartzea ardatz duen Aranzadi Zientzia Elkarteak abiarazi duen #Sugebizi egitasmoak historia modernoan zehar gizakiaren partetik jazarpen zuzena jaso duen bizidun talde honen inguruko ezagutza maila areagotzeaz gain, herritarrak kontzientziatzea du xede. XXI. mendean herrialde aurreratu batean onartezinak diren portaera deitoragarriak baztertuz.
Ion Garin, Aranzadiko Herpetologia saileko zuzendariak dioen moduan ”Bbzidun iheskorrak izan arren, Euskal Herrian 8 suge eta 3 sugegorri espezierekin topo egin dezakegu. Nahiz eta espezie horietako batzuk babestuta egon Nafarroa zein Euskal Autonomia Erkidegoko Espezie Mehatxatuen Zerrendan, euren inguruko ezagutza oso mugatua da eta herritarren parte hartzearen bidez bizidun horien inguruko informazioa lortu nahiko genuke, betiere jarraibide batzuk aintzat hartuz”. Zientzialariaren arabera, ezagutza gakoa izan daiteke animaliarekiko gorrototik errespetura igaro ahal izateko.