Bortxaketa bat eta beste 26 intentsitate baxuko jazarpen, ukitu eta irainak jasan behar izan dituzte emakumeek sanferminetan. Hala salatu zuen jende olde batek atzo mugimendu feministak deitutako protestan. Gazteluko plaza txiki geratu zen indarkeria matxista salatzeko unean. "Haserre gaude berriz ere atera behar izan dugulako eraso matxistak salatzera, horrek esan nahi duen guztiarekin, baina aldi berean pozik jendeak erantzun irmoa eman diolako", azaldu du mugimendu feministako kide Amaia Zubietak. Mugimendu feministak erasoak gaitzesteaz gainera, esan du, badela garaia emakumeek ere libre eta gozagarri izan dezaten festa. "Mugimendu feministaren borrokak eraman du gizartearen kontzientzia areagotzera, kalean are indar handiagoarekin salatzera edozein eraso. Lan horri esker, erakundeak ere martxan jarri dituzte eta gero eta baliabide gehiago eskaintzen dituzte", uste dute. Tamalez, oraindik ezin da esan festak leku seguruak direnik emakumeentzat. Hala ere, aurrera pausuak eman dira eta bide hori egiten segitzen dute erakundeekin batera mugimendu feministatik.
Espetxera bidali dute emakume bat bortxatzea leporatutako gizona
Epaileak behin-behinean eta fidantzarik gabe espetxera bidali du bortxaketa egitea leporatuta Iruñean atxilotu zuten gizona. Nafarroako Justizia Auzitegi Nagusiko informazio iturrien arabera, Instrukzio Auzitegiko guardiako epaileak kasua utzi egin du, eta Emakumeen Kontrako Indarkeria Auzitegiak hartuko du bere gain.
Erakundeek ere bat egin dute
Iruñeko Udalak bat egin du mugimendu feministak elkarretaratzea egiteko deialdiarekin eta adierazpen bat ere onartu du erabateko arbuiua adieraziz. Nafarroako Gobernuak ere parte hartu du Gazteluko plazako elkarretaratzean: Maria Txibite lehendakaria eta Ana Ollo presidenteordea izan dira, besteak beste.