Gorroto-diskurtsoek gero eta presentzia handiagoa dute sare sozialetan, komunikabideetan eta eguneroko elkarrizketetan. Errealitate horri aurre egiteko, Nafarroako Gazteriaren Institutuak eta Nafarroako Garapenerako GKEen Koordinakundeak antolatutako jardunaldian hainbat kolektibo eta erakundek parte hartu zuten.
Zaska sareko Xabi Jauregik azaldu duenez, gure gizartea sinismen-sistema batean murgilduta dago. Ideia eta kontzeptu jakinen inguruan eraikitako aurreiritziak modu estrukturalean erreproduzitzen dira, eta horrek gorroto-diskurtsoak elikatzen ditu.
Gaur egun, generoaren, sexu-aniztasunaren, etorkinen eta itxura fisikoaren inguruko aurreiritziak dira gehien zabaltzen diren gorroto diskurtsoetako batzuk. Horren aurrean, Zaska sareak Nafarroako hainbat tokitan egiten dituen formakuntzen bidez pentsamendu kritikoa sustatu eta herritarren artean eztabaidarako eta hausnarketarako espazio seguruak sortzea du helburu.