Memoria kolektiboa nola eraikitzen den eta arteak prozesu horretan zer paper duen izan ditu hizpide Jone Rubiok gaurko atalean. Tradizioaren eta memoriaren arteko harremana aztertuz, espazio publikoak, gorputzak eta kontakizunek oroitzapenen eraikuntzan duten garrantzia nabarmendu du.
Horretarako, Sra. Polaroiskaren Andrekale proiektua hartu du abiapuntu. 2016an sortutako ikus-entzunezkoak Hernaniko kale baten memoria fikzionatu bat eraikitzen du, emakumeen gorputzak, ospakizunak eta espazio publikoa memoria kolektiboa berraktibatzeko tresna bihurtuz.
Saioan zehar, memoriaren eraikuntzarekin lotutako beste erakusketa batzuk ere aipatu ditu. Besteak beste, Javier Cigaren lanari buruzko erakusketa, artearen historiak ezarri izan dituen hierarkiak aztertzeko, eta Leyre Arraizaren Muskoko erakusketa, memoria herrikoia eta identitate artistikoa uztartzen dituen proposamena.
Jone Rubio arte historialaria da. Artearen historiografia feministatik abiatuta, azken urteetan euskal testuinguruko ekintza performatibo feministak ikertu ditu, bereziki trantsiziotik 2000. urtera arteko praktikak. Bere lanetan memoria, gorputza eta espazio publikoaren arteko harremanak aztertzen ditu, betiere begirada feministatik.