Euskaldunona "erresistentzia baten historia" dela nabarmendu du Aritz Ibarra marrazkilariak. Halaxe islatu nahi izan du Deiadarra. Pirinioetako erresistentzia azken argitalpenean. Hiru urteko dokumentazio eta sorkuntza lanaren ondoren plazaratu berri du Nabarraldek liburua. "Kontakizun hau, beti desagertzeko zorian zirudien arren garaiezinak omen ziren inperioen erorketari biziraun dion herriarena da", dio egileak. Erromatar konkistatik Nafarroako erresumaren burujabetza osoaren amaieraraino, euskaldunon biziraupenerako borondate historikoa laburbiltzen duen ilustrazio-liburua da Deiadarra.
Ez da lehenengo aldia Ibarrak nafar historiarekin lotutako liburu bat plazaratzen duela. Aurretik ere atera zituen Adaxka pozoituak eta Gasteiz 1200. Kasu honetan, alta, komikiaren formatutik atera eta testua eta ilustrazioa uztartzen dituen lana hondu du. "Azken finean", argitu du, "niri nire nerabezaroan irakurtzea gustatuko litzaidakeen historia liburu bat egin dut".