Ongizate emozionala ez da maiz kontutan hartzen den faktore bat gaixotasunak artatzen direnean. Maddi Olano Lizarraga erizain eta ikerlariak argitu moduan, azken urteotan gutxinaka aldatzen doan joera bat da. Izan ere, gaixoaren egoera psikologikoak eragin zuzena izan dezake, bai gaitzaren jatorria aztertzerakoan, baita gaitz horri aurre egiteko moduan ere. Bere kasuan, bihotz gutxiegitasuna pairatzen duten gaixoen inguruan ikertu du, Share izeneko proiektua garatuz. "Gaitz hau daukaten gaixoek, maiz, isolamendua, bakardadea edo depresioa jasan dezakete, ezin dutelako beren bizitza ordurarte bezala egin, aurretik zeukaten bizimodua, maiz, aldatu behar dutelako. Eta horrek zuzenean eragiten du bere inguruarekin duen harremanetan eta, ondorioz, bere egoera emozionalean".
Olano Lizarragak azpimarratu bezala, faktore horiek kontutan hartzea ezinbestekoa da pazientearen ongizatea bermatzeko. "Maiz kontsultategitik bertatik hasi gaitezke horretan". 'Zer moduz zaude' bat galdetzea, izan ere, dirudiena baino pauso garrantzitsuago bat baita. Horretan, gaixoekin harreman zuzena duten erizainek ere badute zer esan. Osasun-sistemaren jerarkiari ere erreparatu dio Olanok, non erizainek zaintzarekin lotutako leku bat betetzen duten, medikuen menera. Ikerketaren alorrean ere, oso ezezaguna den arren, ikerketak eta doktoratuak burutzen direla adierazi digu Olanok.