Soketatik zintzilik eta motozerra eskuan aritzen dira Jon Erro Fagoaga, Beñat Ordoki Telletxea eta Iker Iturria Pombar. Boralan proiektuan, behetik bota edo landu ezin diren zuhaitz zailak kimatu eta mozten dituzte; gehienetan, etxe, hesi edo oztopoen artean, makineriarik sartu ezin den lekuetan.
Baserri giroan hazitakoak dira hirurak eta ofizioa ezagutzen bazuten ere, formakuntza espezifikoak egin dituzte. Diotenez, lan honen atzean prestakuntza eta lan tekniko handia dago. Sare sozialen bidez beren lana erakusten dute, teknikak eta proiektuetako une ezberdinak partekatuz, eta horri esker jende gehiagori iristea lortu dute. Neketsua bada ere, naturan eta gustuko duten ofizioan aritzeak merezi duela diote. Hori bai, proiektuen une gogokoena zein den galdetuta, erantzuna argi izan dute: "lana amaitu, dena ondo atera da eta berriro lurra zapaltzen duzuenean, hori da unerik onena".