Langileen Nazioarteko Egunaren atarian, emakumeek langile mugimenduan izan duten papera ekarri dugu erdigunera, Edurne Turrillas historialariarekin. Bere esanetan, emakume langileen memoria berreskuratzea gaur egungo borrokaren parte da: “Ez dira laguntzaile hutsak izan, subjektu politikoak baizik. Gaur egun ditugun lan baldintzak eta eskubide asko emakume horien borrokari esker lortu dira”.
Zaintza lanek historian zehar eta gaur egun duten garrantzia azpimarratu du. Lehen etxe barruan eta dohainik egiten zen lana gaur egun merkatura atera bada ere, emakumeek jarraitzen dute zama nagusia bere gain hartzen. Gainera, kasu askotan, emakume migranteak sufritzen dute lan esparru horren baldintza prekarioak. Amatasunak eta zaintza ardurek emakumeen ibilbide profesionalean duten eragina ere nabarmendu du: “Ama direnean askotan militantzia edo lan ibilbidea alde batera utzi behar dute eta, horrek, ondorioak ditu garapen profesionalean eta pentsioetan”. Zaintza lana, gainera, oraindik ere ikusezina da neurri handi batean.
Turrillasek dio hobekuntza legalak egon direla, baina arazoaren oinarria ez dela desagertu: “Egiturazko arazo bat da. Formak aldatu dira, baina zama emakumeen gain jarraitzen du”. Horregatik, zaintza lana aitortzea, lanaren definizioa zabaltzea eta ardura hori gizarte osoaren eta instituzioen artean banatzea beharrezkotzat jo du.