Ostiralean kontzertu bikoitza hartuko du Labako oholtzak. Harat eta Kaskezur taldeak arituko dira bertan, 20:30etik aurrera, eta sarrerak dagoeneko salgai daude Labaren webgunean. Biek ala biek bide luzea daramate bizkarrean, bi hamarkadez hainbat disko eta bestelako proiektu musikal uztartu baituzte. Elkar lotzen dituen hamaika arrazoi eta kontu aipatu ditugu Ion Mindegia Kaskezur taldeko abeslariarekin. Musika dago noski horien oinarrian, baina abeslariak ekarri digun musika hautaketaren bitartez bestelako ondorioetara ere iritsi gara. Musika bizitzeko eta ulertzeko moduez gain, nagusiki, laguntasuna baitute komunean bi taldeak osatzen duten kideek.