Zabaldu zenetik denbora gutxi igaro bada ere, dagoeneko ezagunak egin dira jendartean Estafeta kaleko Gatza tabernako piper beteak. "Lodosako piperrekin egindakoak, noski", azpimarratu du Julen Urtasun tabernako sukaldariak. Lagun artean ireki dute ostatu berria, orain arte kudeatu duten Olio Pizza jatetxea bezala. Horiek izan daitezke bi proiektuek komunean dituzten ezaugarriak: sukaldaritza pasioz bizi duten lagunen arteko proiektua izatea eta tokiko produktuak lehenesten duen sukaldaritza egitea, gauza guztien gainetik. "Pizza berez italiarra da, baina gure jatetxea ez da italiarra, bertako elikagaiekin egiten dugulako". Bai Oliok bai Gatzak harrera ezin hobea izan dute jendartean, beren formula arrakastatsua denaren seinale.