Karrikiri "denda bat baino gehiago" dela argi du Jon Bujandak, baita Iruñerriko euskal komunitate osoak ere. Izan ere, euskal kulturaren erakusleiho eta gotorleku izan da. "Aspalditik egin dugun apustua da, eta euskaraz kalitatea zein kantitatea badela defendatzen dugu, bakoitzak aukeratu dezakeela gustuko duen hori", nabarmentzen du Bujandak. "Euskal kultura ez da atal bat, osotasun bat baizik". Liburuak, diskoak eta arropa ez ezik, bestelako zerbitzuak ere eskaintzen dizkio Karrikirik bezeroei, tartean pisukideak bilatzeko zerbitzua, Bujandaren erranetan "oso ongi funtzionatzen duena".