Nafarroako mendialdea, kontrabandoaren garaia eta mitologia, gaua, fantasia eta beldurra. Osagai guzti horiek biltzen dira Ekaitz Bertiz zuzendari sunbildarraren Erreka zoko hortan film laburrean. Donostiako Zinemaldiko Kimuak sailean erakusteko hautatua izan zen eta horren ondotik hainbat jaialdiatan egoteko aukera izan du. Han eta hemen, hainbat sari jasotakoa da. Asteburu honetan bertan Santurtziko Santurzine jaialdian erakutsi da, eta ez da esku hutsik bueltatu handik: EITB-euskal pantailak saria eta Andolin Eguzkitza saria irabazi ditu bertan.
Bestelako abentura zinematografikoetan ere buru-belarri sartuta dabil sunbildarra, tartean Javi Ambrosiren eta Javi Calvoren, Los Javis espainiar zinemagile ospetsuen, La bola negra filmaren grabaketan parte hartzeko aukera izan du, zuzendaritza taldearen barrenean. Ez du gaizki hasi bere ibilbide profesionala 22 urteko zuzendari gazteak, hartara.
Malerrekako mendietan kokatzen da Erreka zoko hortan, Ekaitz Bertizek (Sunbilla, 2003), gerra garaiko kontrabando istorio bat. Joxepi protagonista gazteak gaixorik dagoen aita ordezkatu beharko du kontrabando jardunean. Gau ilunean, basoan barrena, haren beldurrak azaleratuko dira. Izan ere, "karabineroak ez dira gauak izkutatzen dituen gauzik beldurgarriena izanen". Kritikak eta publikoak bat egin dute zuzendari gaztearen lehen jendaurreko lana goraipatzen: "Agitz bide polita egiten ari da filma, konten nago alde horretatik".