Txiki gelditu zen Leitzako kultur aretoa larunbatean jokatu zen Nafarroako Bertsolari Txapelketako finalaurrekorako. Jendetza aurreikusita, azkenean kiroldegian egin zen saioa eta 350 bertsozale bildu ziren bertan, saioa bertatik bertara jarraitzeko. Egungo txapeldun Julio Soto nagusitu zen. Nafarroako txapeldunak beste behin erakutsi zuen indartsu datorrela eta txapelari eusteko asmo osoa duela: 526,5 puntu eskuratu zituen, orain arteko markarik altuena. Eneko Lazkoz bezala, zuzenean pasako da finalera Gorritikoa. Hurrenkeran, Sarai Roblesek egin zuen bigarren Leitzan, puntuazio aski ona lortuz; eta haren atzetik gelditu ziren Mikel Lasarte, Kattin Madariaga, Patxi Castillo eta Jabi Lezaun.
Ainara Ieregi kolaboratzaileak argitu moduan, oso saio ederra osatu zuten oholtzako sei bertsolariek. Nabarmentzekoak izan ziren zortziko handiko ariketak, baita bakarkako batzuk ere. Ieregirekin errepasoa egin diogu azken aurreko saioko une hoberenei.
Finalaurreko bakarra gelditzen zaio txapelketari, hain zuzen ere heldu den igandean, azaroak 16, Tafallan jokatuko dena. Hango pilotalekuan ariko dira kantari Amaia Elizagoien Varela, Ekain Alegre Gil, Joanes Illarregi Marzol, Josu Sanjurjo Alzuri, Xabat Illarregi Marzol eta Xabi Maia Etxeberria. Orduan jakingo da zeintzuk diren zortzi finalistak. Une honetan, horrela dago finalaurrekoetako sailkapena. Gogoratu finalerako sarrerak salgai daudela dagoeneko, www.bertsosarrerak.eus atarian.