Los Arcosen jarrita zeuden begirada guztiak eta bertsolariek ez zioten hutsik egin beraietaz espero zenaren inguruan. Lehenengo faseko azken saioa izatearen presioari aurre egitea lortu eta saio borobila, maila altukoa ematea erdietsi zuen oholtza gaineko seikoteak. Joanes Illarregi nagusitu zen, 361,5 punturekin, eta haren atzetik gelditu ziren Saioa Alkaiza (340,5), Mikel Lasarte (339), Ekain Alegre (332,5), Kattin Madariaga (331) eta Xabi Maia (319,5).
Leitzako bertsolariak azaroaren 16an Tafallan aritzeko pase zuzena lortu zuen, eta gainontzeko guztiak hurrengo fasera igarotzea lortu dute eskuratutako puntuei esker. Ainara Ieregirekin saioko bertsoaldi hoberenei errepasoa egin diogu gaurko atalean: zortziko handiko lehenengo ariketa eta zortziko txikiko bi berreskuratu ditugu horretarako. Ieregiren hitzetan, fin aritu ziren bertsolari guztiak, eta txapelketan aurrera jarraitzea merezi dutela erakutsi zuten.
Puntuak-puntu, definituta gelditu dira txapelketako azken txanpako hiru saioak. Azaroaren 1ean Agoitzen izanen da lehenengo finalaurrekoa, azaroaren 8an Leitzan, eta azaroaren 16an Tafallan. Hauetako bakoitzean garaipena eskuratuko duen bertsolariak bermatuta izango du Iruñeko final handiko eserlekuetako bat, eta beste bost bertsolari puntuazio bitartez sailkatuko dira. Ieregiren erranetan, "dena oso irekita dago oraindik, edozer gauza gerta daiteke".