Doakoa bada, norbaiti garesti aterako zaiolako da. Porno plataforma askorekin betetzen den lema da, Julen Linazasoro hezitzaile digitalak azaldutakoari jarraituz. "Interneten aurkitzen ditugun porno plataforma handienak doakoak dira eta iragarkietan oinarritzen dituzten beren irabaziak. Horrek esan nahi du ez dutela inolako kontrolik edo moderaziorik egiten plataformara igotzen diren edukien inguruan". Adibide gisa, PornHubek sortzen dituen iragarki inpresio kopurua jarri du Linazasorok: egunean 4,6 milioi publizitate inpresio ditu, hilabetean 40 milioi dolarretako irabazietan itzultzen dena. Hala, plataforma hauentzat edukiak zer dakarren baino, ahal bezain eduki kopuru gehien edukitzean datza gakoa. Plataformako arduradunek "eskuak garbitzen dituzte" eduki-kontrolaren inguruan, "edukiak erabiltzaileek igotzen dituztela argudiatuz, eta ez beraiek".
Kontrol ezak zulo ilun bat irekitzen du, non indarkeria, bortxaketak eta abusuak ohiko eduki bilakatzen diren. "Plataforma hauetan agertzen diren edukietako asko benetako bortxaketak dira. Eta hauek jasan dituen biktima batek, adibidez, bideoa ezabatzeko eskatzen badu, plataformak frogarazi egiten dio alde batetik, bera dela; eta bestetik, bortxaketa hori jasan duela". Biktimari eskatzen zaizkio azalpenak, beraz. Guzti honen atzean dagoena enpresa erabakiak direla azpimarratu du Linazasorok.