Abiadura Handiko Trenaren inguruko azken berriak dira: Espainiako Gobernuak hirugarren aukera gisa planteatutakoa gero eta indar handiagoa hartzen ari da. Aralar zulatu beharrean, Aralar inguratzea ekarriko luke. Hori horrela, jakinarazi berri du laster abiatuko dituztela lan horiek aurrera eraman ahal izateko beharrezkoak diren zundaketa lanak. Nafarroan, Bakaikun dira egitekoak. Hirugarren alternatiba gisa planteatutakoa ere gaitzetsi dute abiadura handiko trenaren kontrako eragileek: "Agerikoa da Aralarri eragiten diola eta eraso ekologikoa antzekoa dela", adierazi du Julio Villanueva Stop Zundaketak plataformako kideak. Zundaketa lan horiek abiatuko dituzten herrietako udalei eskatu diete ez ditzatela baimendu eta ez dezatela laguntzarik eskaini. Era berean, herritarrei adi egoteko eskaera ere egin dute: "Edozein momentutan iritsi daitezke langileak lur eremu horietara. Horren berri izanez gero gurekin harremanetan jartzeko eskaera egiten diegu bizilagunei", adierazi du. Abiadura handiko trenik behar ez dela sinetsirik daude: "Beste azpiegitura handi asko bezala honek ere ez du zentzurik", nabarmendu du. Euskalerria Irratian Julio Villanuevari egindako elkarrizketa argazkian klik eginda entzun daiteke.