Nagikeria astintzeko “Alo, mogie!” esamoldea hizpide hartuta, Aritz Carballo gazteak Mogiegim, lehenengo kiroldegi gurpilduna abiarazi du udara honetan. Erroibar, Artze eta Aezkoako bailaretan barrena dabil uztailetik aurrera, adin guztietara egokitutako klaseak ematen.
Proiektua aitzindaria da Nafarroan, bakarrenetakoa estatu mailan ere. Ariketa fisikoa egiteko oztopoak kentzea du helburu, batez ere sakabanatze geografiko handiko eremuetan eta biztanleria zahartuan.
Indar ariketa funtzionalak, egunerokoa hobetzera bideratutakoak egiten dituztela azpimarratu du Carballok, adin tarte desberdinetara egokitu dituenak. Udarako egitaraua iraila erdialdera arte luzatuko da, eta ondoren ere aurrera jarraitzeko asmoa dago. Laster emanen da Mogiegimen neguko eskaintzaren berri. Bitartean, Erroibar, Artze eta Aezkoako bailarak zeharkatzen jarraituko du Nafarroako lehenengo kiroldegi gurpildunak.