Desadostasun judizial batek atzeratu ditu Glovo etxez etxeko banaketa enpresako hauteskunde sindikalak. Hala jakinarazi dute banaketa lanetan Glovorentzat aritzen diren langileek Iruñean egindako elkarretaratze batean. Ostiralean ziren hauteskunde mahaira joatekoak botoa ematera. Horren ordez, protesta egin behar izan dute, azken orduko inpugnazio bat tarteko: "Hauteskunde sindikalak geldiarazi dituzte, atzeratu", salatu du Pablo Diaz CCOO sindikatuarekin zerrendaburu den langileak. Arazo nagusia, Glovorentzat lan egiten duten langileen erroldaren interpretazioan dago sindikatuen eta kontrol organoaren artean desadostasunak baitaude. "UGT sindikatua enpresaren alde jarri da eta langileak albo batean utzi ditu, gure eskubideen defentsa egin ordez, Glovo beraren aldeko jarrera hartu du", kritikatu du.
Langileak ez daude "men" egiteko prest ez eta euren eskubideen aldeko lana eteteko prest ere. Oztopo guztiak gainditu eta euren lanpostuen eta bizitza duina izateko eskubidea defendatzen segitzeko asmoa dutela argi utzi dute: "Ez dugu atzera eguiteko asmorik. Antolatuta gaude. Horrelako oztopoek are indar handiagoa ematen digute. Hemendik 20 egunera berriz ere itzuliko gara eta hauteskunde sindikalak eginen ditugu", jakinarazi du. Comisiones Obreras sindikatuaren babesa dutela ere adierazi dute langileek. Sistemaren bidegabekeriak salatzen segituko dute elkarrekin eta euren ahotsaren bozeramale izanen direla nabarmendu dute.
Hamahiru ordezkari hautatzeko prozesua amaitutzat jo beharko lukete ostiralean. Ospakizunetan ariko lirateke orain "mugarri" baita Glovo bezalako banaketa enpresa batean langileen ordezkariak izatea. "UGT sindikatuarengatik izan ez balitz, berak aurkeztutako inpugnazioarengatik, orain 13 ordezkari izanen genituzke. 9 aukeratzera pasa beharko dugu datozen egunetan. Prozesua hutsetik abiarazi behar dugu berriz", kexatu da. Argi dute, hilabete baten bueltan, irailaren lehen astetarako lortuko dutela ordezkaritza sindikala erdiestea. Hori izanen da langileentzat bide emanen diena lan baldintza duinagoak izateko: "Lan batzorde bat izatea enpresari aurre egiteko tresna izatea da eta finean, langileen egunerokotasuna hobetuko duen taldea eratzea", esan dute.
