Blues eta rock doinuak izango dira nagusi igande honetan Erronkari ibarreko Urzainki herrian. Aurreko zortzi edizioetan bezala, abuztuko lehen igandean emakumeen ahotsak ekartzen dituzte herrira.
Izan ere, Eneko Egiguren antolatzaileak adierazi bezala, helburu argi batekin abiatu zuten jaialdia: “kalitatezko kontzertuak entzuteko hiriburuetara edo jaialdi oso berezietara joan behar zara, landa eremuan kalitatezko musika eskaintzea aldarrikatu nahi genuen”.
Granadatik etorrita Angela HooDook bidaia hipnotikoa proposatzen du blues, swing eta rockaren bidez. Ostean, Inés Eleuteriak gidatuta, Mississippi Queen & The Wet Dogs taldea igoko da oholtzara. Taldeak hamar urte bete berri ditu musika afroamerikarra, soula eta gospela uztartuta.
Aldarrikapen artean jaio zen Neskak Fest musika jaialdia eta hala mantendu da. Igandean, arratsaldeko 19:30ean hasiko dira kontzertuak herriko frontoian eta doakoak izango dira.