Itsaso Bakedano "pribilegiatua" sentitzen da bere sexu kontsultategira hurbiltzen direnei lagunduz. Sexu hezitzaileak nabarmendu bezala, sexualitatearen inguruko kezka edo arazo desberdinei irteera emateko bertaratzen dira berera. "Lehenengo urrats hori emateak oraindik kosta egiten du, tabu eta beldur asko ditugulako oraindik eremu honetan. Baina pisu hori gainetik kentzerakoan, jendea loratzen ikusten dut, oso polita da prozesu hori ikustea".
Gaur egun Barañainen zein Donostian jarduten du Bakedanok, aholkularitza zein kontsulta zerbitzuak eskainiz. "Aholkularitza sexologikoa esku-hartze laburra da, eta zalantzak, kezkak, zailtasun pertsonalak edo profesionalak dituzten pertsonei zuzendua. Pertsonari, bikotekideari edo profesional-taldeari laguntzea eta orientatzea da helburua, nork bere gakoak aurki ditzan". Kontsultan, aldiz, esku-hartze zabalagoa eskaintzen du, bai banaka bai bikoteka. Bertan, "gertatzen denari arreta jartzeaz gain, harremantzeko eta izateko modu berriak" bilatzen laguntzen die bezeroei, "baita gehiago gozatzen lagunduko diguten bestelako gakoak aurkitzen ere".