40 egun baino ez zaizkie geratzen enpresak itxi ez dezan ahaleginak egiteko. Ekainaren 16an amaituko litzateke zuzendaritzak jarritako epea. Denborarekin malgu jokatzeko eskatu diete, industrializazio prozesu batek eskatzen duena bezain beste. Gizartean euren ahotsa entzuten segitzeko ekimenen artean, hauxe ere mahai gainean jarri dute: "Atzo sanferminak prestatzeko biltzen den mahaian izan ziren langileetako batzuk eta txupinazoa botatzeko gure nahia helarazi genien. Horrekin nazioarteko ikusgarritasuna eskuratuko genuke", esan du Sergio Ayucar LAB sindikatuko ordezkari eta BSHko langileak.
Aurrera pausorik ez da ia eman abenduan BSHko zuzendaritzak Eskirozko lantokia ixteko asmoa helarazi zuenetik. 655 familiaren etorkizuna dago jokoan ordutik. Etengabekoa da enpresa itxi ez dezaten egiten ari diren lana. Dena dela, langileak baztertuta sentitzen dira erabakiak hartzen diren eremuetatik: "Informazioa baino ez digute helarazten".
Eskirozko lantokiak jasotzen ditu bisitak eta langileek itxaropena ez dute galdu. Itxiera ekiditeko bilera eta lanek diskrezioa eskatzen dute. Era berean, euren egoera kritikoa dela adierazten segitzeko asmoa dute langileek.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!