"Heriotzara kondenatu gaituzte", hitz horiekin eman diote amaiera Altsasuko Sunsundegiko langileek gaurko agerraldiari. Lantokiaren atarian batu dira. Apirilaren 14an sartuko da enpresa likidazioan eta horren aurrean ez direla geldirik geratuko jakinarazi dute: "Azken aukera arte borrokan segituko dugu". Sakanako LAB sindikatuko ordezkaria da Gaizka Uharte: "Enpresak egindako kudeaketa okerrak eraman du Sunsundegi egoera honetara". Langileak kezkatuta daude eta saminduta: "Lana badago eta lan talde kualifikatua gara. Ezin sinetsirik gaude egoera honetan egon gaitezkeenik". 340 langile ari dira une hauetan lanean Sunsundegin eta zeharkako lanpostuak kontuan hartuta 500 inguru gera daitezke kale gorrian.
Nafarroako Gobernuaren babesa sentitzen dutela diote langileek: "Aritu dira aukerak aztertzen, baina beharrezkoa da azkenera arte saiatzea, ahalegintzea, aukera desberdinak mahai gainean jartzea, irudimena erabiltzea". Heldu den astean, hilaren 9an elkarretaratzea eginen dute eta manifestazioa ostiralean. Bi protestak Altsasun eginen dituzte.
LAB sindikatuko Sakanako ordezkari Gaizka Uharterekin egindako elkarrizketa argazkian klik eginda entzun daiteke.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!