Zapalduon pedagogia, edo nola libre hazi, hezi bizi izenburupean, Ane Ablanedo irakasle eta hezitzaileak Argia aldizkarian plazaratu dituen iritzi artikuluak bildu ditu, Berria egunkarian argitaratutako baten batekin osatuz. Heziketa, haziera, psikologia edo psikoanalisia ditu hizpide bere hausnarketetan, betiere euskal gizartearen testuingurutik, non euskara, euskal hezkuntza edo autodeterminazioa dituen solasgai.
Datorren asteartean, urtarrilaren 28an, aurkeztuko du liburua Ablanedok Karrikiri euskal dendan, Xamar idazleak aurkeztuko duen saio batean. 19:30ean izanen da hitzordua.
Beste ororen gainetik, Eneko Bidegainek liburuaren hitzaurrean dioen bezala, askatasuna da hitz gakoa. Izan ere, herri zapaldu gisa euskaldunok bizi gaituen indarkeriaz jabetzeko, askatasunaren pedagogia oinarrizkoa dela iruditzen zaio. Are gehiago, gaur egun herri zapalduaren kontzientzia lausotu dela nabarmendu du, horrek dakarren arriskuarekin.
