"Amalurrak ondo badaki gizakiok garela berak sortu dituen izakirik ahulena eta, horregatik, askotan laguntzen gaitu. Baina ez beti, gizakiok ulertu eta ikasi behar dugulako beste izakiak eta bizi garen tokia errespetatzeko eta zaintzeko premia dugula". Bakarne Atxukarrok, Izaskun Zubialderekin eta Asun Egurzarekin batera Amalur haurrentzako bilduma plazaratu berri du, Denonartean argitaletxearen zigilupean.
Ez da lehenengo aldia euskal mitologiaren inguruan jarduten duela. Izan ere, honekin ale bat gehitu dio Olentzero eta Mari Domingi, Mari, Basajaun eta Tartalo pertsonaiekin hasi zuen bildumari. Aurretik ere Euskal mitologia. Haurrentzako ipuinak izeneko ale bikoitza argitaratua zuen 2015ean eta 2016an, beraz aski jorratutako gaia du.
