Euskaraz eta gazteleraz plazaratu da Iñigo Larramendik idatzi eta Eneko Lizardik marraztutako Oneka, Iruñeko erresumaren sorrera, 24 orriko komikia. Laburra izanagatik ere, kalitate nabarmeneko alea da onakoa. Protagonista, Iruñeko Erresuman berebiziko garrantzia izan zuen estratega: Oneka, Eneko Aritzaren ama.
"Eneko Aritza bezalako figura bat oso ezaguna da Iruñeko Erresumaren sorreran", azaldu digu marrazkilariak, "baina Onekak ez du onarpen berdina izan, behintzat jendartean. Komiki honen helburua horduko emakumeen protagonismoa azaltzea izan da. Onekaren kasuan, oso garrantzitsua izan zen familia eta leinu desberdinen artean loturak sortuz. Estratega bat izan zen".
Hernaniko komiki azokan jendarteratu ondoren, Durangoko Azoka izanen du Onekak hurrengo hitzordua. Abenduaren 7an, larunbatarekin aurkeztuko dute bi egileek komikia Landakoguneko Talaian, 18:30ean.
