Amnesiak jota aritu ziren gorritxoak, eta ahaztu egin zitzaien nor diren. Intentsitaterik eta adorerik gabe jokatu zuten, eta hori bekatua da Bernabeu bezalako plaza zail batean.
Ancelottiren taldea zalantzaz josita zegoen, etxean bi porrot mingarri kateatu ostean. Hori gutxi ez, eta lehen zatian hiru jokalari galdu zituzten zuriek, lesioen ondorioz. Baina alferrik: Osasuna bere onenetik oso urrun ibili zen, eta golak jaso ahala, desagertu egin zen berdegunetik. Azkenean, 0 eta 4. Bere txarrean, bosgarren postuari eutsi diote Vicente Morenoren mutilek.
Emakumeen taldeari dagokionez, bina berdindu zuen atzo Taxoaren DUX Logroñoren kontra. 0-2 hasi zen galtzen. 80.ean Yiyik, aldea murriztu, eta 86.ean binako gola Nerea Salinasek. Puntu baliotsua. Hilabete arraroa izan da, azken bost asteetan ligako bi partida bakarrik (FCB eta VIL bertan behera). Igandean, AEM.
Kirolerria saioko asteroko tertulian bi partidak izan dituzte hizpide Ane Martiarena eta Unai Lakok, Eñaut Agirrebengoaren gidaritzapean. Solasaldia entzungai hemen.
