Virenque talde iruindarrak prest du bere disko berria. Falsollano izenburupean, hirukoteak 7 kantu bildu ditu diskoan. Munduaren egoera, gizartearen kontraesanak edota taldearen beraren etorkizuna dituzte mintzagai, bertzeak bertze, euskara hutsean datozen kantu hauetan. Diskoko lehenengo bi kantuak argitaratu dituzte plataformetan momentuz, Anitzak eta Bizkarroiak, eta gainontzeetako batzuk entzuteko parada izan dugu Irrintzi Plaza saioan.
Abesti guzti hauek, bestalde, zuzenekora eramanen dituzte asteburu honetan, larunbatean, Lizoaingo eliza zaharrean prestatu duten kontzertu berezi batean. Eneko Leza, Eneko Zabalza eta Aritz Gonzalez hirukoteak emanaldi berezi honen berri eman digute.
