Urriaren 29an izan zen hezkuntza publikoko sindikatuek deitutako bigarren greba eguna: “Kontent gaude irakasleen erantzunarekin eta hezkuntza komunitate osoaren inplikazioarekin”, adierazi dute sindikatuek ohar batean. Lehenengo greba egunak baino indar handiagoa izan zuela uste dute eta horrek erakusten du “irakasleen haserrea”. Jakin badakite Nafarroako Gobernuak eta EH Bilduk adostutako 2025erako aurrekontuek ez dutela biltzen diru-partidarik euren aldarrikapenak erantzunen dituena, baina “oraindik garaiz dabiltza zuzenketen bitartez irakasleen eskaerei erantzuteko”.
Edozein modutan, Hezkuntza departamentuak azaroaren 11n deitu du Mahai Sektoriala eta bertatik neurri zehatzik gabe ateratzekotan mobilizazio gehiagorekin segitzeko asmoa dutela ere iragarri dute.
