Beldurrari buruzko album umoretsua dugu Mamuki. Gau Beltza da, eta mamuek sustoak eman behar dituzte, ingurumarian ikara eragin beharra daukate. Baina mamu txikia gaixorik dago eta hainbat pertsonaia beldurgarri saiatuko dira hura osatzen edo sendatzen: banpiroa, zonbia… edo geureago ditugun Zakuzahar edo Otsoko, baina alfer-alferrik. Gaixoa! Zer egingo du Mamukik Gau Beltza ospatu ezinik…? Etxeko agertoki minimalistan txakur jolastia ere saiatuko da Mamuki sendatzen, baina orduak joan, orduak etorri, munstroak joan, munstroak etorri, ez da konponbiderik inondik ere agertuko. Edo bai…
Hauxe da Mamuki-k, Nafarroako hainbat toki-entitatek Pamiela argitaletxearekin batera antolatzen duten Etxepare haurrentzako album ilustratuen lehiaketako saridunak duen abiapuntua. Nerea Ariznabarretak idatzi eta Maite Rosendek ilustratu duen kontakizunak umorea eta beldurra uztartzen ditu, beraiek nabarmendu bezala, ez baitago tresna hobeagorik beldurraz hitz egiteko.
