"Madrilera joateko gonbitea izan dut, Espainiako Telebista Publikoko zuzendaritza kontseilura. Erronka handia da, baina une oso garrantzitsu batean iristen dena", adierazi du pozik Maria Solana Geroa Baiko eledunak. "Beti lan egin izan dut zerbitzu publikoaren alde eta horixe egiten segitzeko asmoa dut", azaldu du.
RTVEn ente pluralago eta anitzagoa osatu nahi izan dela uste du Solanak: "Horrek niretzako balio handia dauka. Horren parte izateko aukera bada, horixe defendatuko dut", gaineratu du. Zeregin berri horrekin dena dela ez du amaitutzat jo bere ibilbide politikoa: "Dena da politika. Alor desberdinetatik egin daiteke politika", esan du. Jendartea kohesionatzeko eta guztion bizi kalitatea ziurtatzeko ezinbestekoa da politik Solanaren arabera eta beraz, "politikan ibilbideak ez dauka eperik".
